१.(लघुकथा) प्रस्तुति

(लघुकथा)

प्रस्तुति

सरण राई

प्रस्तुति सबैले देख्ने, भाेग्ने र अनुभुत गर्ने भएकाले  कला रहेछ भन्ने अनुभव हुन्छ ।

म सकिनसकि लेख्छु र सामाजिक सञ्जाल, फेसबुक र साहित्यिक समूहहरूमा पाेष्ट गर्छु । पाेष्ट गरेकाे तुरुन्तै लाइक र कमेन्ट टिप्पणिहरू आइ हाल्छ । नपढि नहेरि नै पनि कतिपय टिप्पणि र लाइक  गरिएकाे हुन्छ ।

 तर  जे हाेस् - लाइक र कमेन्टहरू  ! सामाजिक सञ्जालकाे मजा ! 

रचना पठाएर  छापिन्छ छापिदैन,कहिले छापिएला ? पर्खिरहनु परेन  । राेप्नु बित्तिकै फल लाग्ने । तुरून्ताका तुरुन्तै लाइक र कमेन्टहरू  ! 

मलाई  पनि याे लत लागेकाे छ । एउटा 'लधुकथा'  पाेष्ट गर्छु ।  तुरून्ताका तुरुन्तै लाइक र कमेन्टहरू  !

लाइक र कमेन्टहरूकाे आधारमा परिमार्जन गरेर अन्तिम टुङ्गाे लगाउने गर्दछु ।

 पहिलाे कमेन्ट  -  'याे संस्मरण भाे, लघुकथा भएन ।'नाम नचलेकाे तर आँठ दसवटा किताब प्रकाशन गरि सकेका भए पनि स्थापित हुन नसकेका मजस्तै  लेखककाे टिप्पणि  । 

अर्काे कमेन्ट  -  'कति मीठाे संस्मरण, बधाई ! ' नाम चलेकाे स्थापित लेखककाे टिप्पणि ।

 पहिलाे टिप्पणिले मलाई  जङ चलाएकाे हुन्छ - बढि जान्ने ! अर्काे टिप्पणिकाे अर्थ पनि  पहिलाे टिप्पणिकै जस्ताे छ तर शालीनतासाथ प्रस्तुत गरिएकाेले मिठासपूर्ण छ ।

यी टिप्पणिहरूबाट म शिक्षा पाउछु - शालीन प्रस्तुति र प्रस्तुतिकरण जीवनमा  सफलताकाे जग रहेछ !

२०७७ जेठ २३, लकडाउन